General Santos City—Samad sa likod ug bukton ang naangkon sa usa ka Jopit Sacandal, 22 anyos nga taga Purok 4, Barangay Labangal, Gensan human kining gipusil sa wala pa mailhing suspetsado alas 12:00 ang takna sa tungang gabie sa may Salazar Street, Barangay South, Gensan.
Sa interview sa RMN Gensan News Team ngadto sa biktima, iyang gibutyag nga samtang siya nagbaktas, iyang namatigdan ang usa ka babaye ug lalaki nga nag away matud pa daplin sa dalan.
Ginapasakitan matud pa sa lalaki ang babaye mao nga iyang giduol dayon iyang giuwang ang away sa duruha, apan nasuko ang suspek ug siya gipusil gamit ang sumpak.
Paspas nga misibat ang suspek sa wala sayring lugar samtang ang biktima nahimo pa ang paghidangat sa ospital. Sa karon ginaatiman nalang sa mga doctor sa maong balay tambalanan ang biktima, samtang nagpahigayon na ug makuting imbistigasyon ang kapulisan kalabutan sa maong insidenti.
