TALISAY CITY, NEGROS OCCIDENTAL – Aksidente nga nalukpan sang cellphone ang isa ka lalaki matapos nga nagpangilat kahapon sang hapon sa Brgy. Cabatangan, ciudad sang Talisay.
Nakilala ang biktima nga si Charliedon Loredo, 31 anyos ang edad, caretaker sang Milkyway Gamefarm kag maintenance staff sang Kampo Hiyang-hiyang Resort sa Sitio Campuestuhan, Brgy. Cabatangan, Talisay City.
Suno sa biktima nga may mga las 2 kahapon sang hapon, siya kag ang iya abyan ang yara sa sulod sang kamalig agud magpahuway-huway bangud nga naga-ulan.
Uyat sini ang Iphone sang iya abyan nga naga-angot sa charger kon diin nagalantaw ini sang pelikula nga Mask of Zorro sa Youtube.
Pahayag ni Loredo nga nagluntad ang ulan kag ginsundan sang pagpangilat kag daguob kon diin nakibot na lamang ini siya sang gulpi nga naglupok una ang charger kag naglatay ini sa cellphone nga iya gina-uyatan.
Siling pa niya nga kusog pa sa lupok sang .45 nga armas ang lupok sang cellphone nga gin-agihan sang koryente sang pagpangilat.
Dugang pa sang biktima nga nagkarab-karab ang cellphone gani napaso ini sa iya tuo nga palad kag sa iya tudlo subong man paso sa iya likod bangud sang paglupok man sang charger.
Dali-dali nga gindala sa ospital pasado las dos ang biktima apang mga las 6 sang gab-i gilayon man ini nga nakagwa bangud minor injuries lamang ang iya naangkon./dyHB BACOLOD
