Davao City- Aduna na matud pay lead ang kapulisan sa Isulan bahin sa nahitabong pagpamomba sa Isulan, Sultan Kudarat nga gikamatay sa 3 katao na ug kapin 30 ang samaran.
Sa update gikan sa RMN Koronadal, matud pa gikumpirma ni Police chief Director General Oscar Albayalde atol sa pagbisita niini sa nasangpit nga lugar nga aduna nay mga suspek kinsa nagbilin sa Improvised Explosive Device kun IED base usa sa mga testigo sa maong panghitabo.
Dugang sa hepe nga gamiton kining basehan sa pagalawman nga imbestigasyon diin mugnaon ang usa ka investigation group nga pangunahan ni Police Regional Office 12 Regional director PSSUPT Oliver Alilis Enmodias aron daling masulbad ang kaso sa pagpamomba sa lugar.
Sa karon, aduna nay gipagula nga artist sketch sa usa sa mga suspek sa Isulan bombing diin ginaberipika pa ang pangalan niini, anaa sa 5’6-5’7 ang gitas-on, 20-25 anyos ang pangidaron, ug matud pa nakasuot og black t-shirt, dark colored pants ug black bagpack uban ang usa pa ka wala mailhing kauban niini nga nakasuot og white t-shirt ug short pants sakay sa single nga motorsiklo.
Sa pikas bahin, wala mihanayon ang pagbisita ni Presidente Rodrigo Duterte karong adlawa ug wala pa usab masayod si Isulan Mayor Marites Pallasigue og unsang adlawa mubisita ang pamuno-nasud sa maong lugar.
RadyoMaN Renz Barbarona
