Report ni: Tita Jen Palomo Debaja
Isa ka 44 anyos nga Filipina domestic helper sa Hong Kong ang padayon nga gina obserbahan sa Pamela Youde Nethersole Eastern Hospital matapos nakit an nga wala sa iya kaugalingon sa Fortress Hill MTR Station sang nagligad nga adlaw.
Sa nagviral nga video footage, makit-an ang pinay nga yara sa madalom nga pag pangamuyo samtang naga hambal sang “ako ang tagapagligtas ninyong lahat”.
Sa isa ka scenario, makit-an ang OFW nga naga dupa kag nag luhod dala hapa sa semento sa igutlan sang alagyan samtang gina palibutan sang station guards kag pila ka pinay nga nag comfort sa iya.
Ginkumpirmar ni welfare officer Lorna Obedoza sang OWWA Hong Kong nga naga obra sa North Point ang nasambit nga OFW. Gilayun man nga ginpahibalo ang employers sang pinay kag naka bisita naman sila sa iya sa hospital.
Suno pa gid kay Obedoza napalab-ot na sa pamilya sang OFW sa Southern Leyte ang natabo sa iya.
Nahibaluan man nga sobra na 7 ka tuig nga naga obra ang pinay sa mga amo sini kag isa pa ka dalaga. Wala pa napat-od asta karon kon ano ang rason sa apparent breakdown sang pinay.
Basi sa police record, takna alas 9:15 sang gab-i, Mayo 1 sang nakabaton ang mga ini sang reklamo nahanungod sa isa ka foreign woman nga naga obstruct sa iban nga pasahero sa sulod sang Fortress Hill MTR Station.
Una nga gindala sang nagresponde nga kapulisan sa Ruttonjee Hospital ang pinay para madapatan sang bulong apang ginsaylo ini sa Eastern Hospital para sa psychiatric treatment. Gin classify sang police ang kaso bilang ‘suspected mentally disordered person found’.
