CADIZ CITY, NEGROS OCCIDENTAL – Gin-declare dead on arrival ang tatlo tanan ka mga biktima sang natabo nga vehicular accident sa national road sang Brgy. Burgos, Cadiz City pasado las 10 kagab-i.
Nakilala ang mga biktima nga sanday Angelica Laguna, 27 anyos kag ang iya 4-ka tuig nga bata nga si Zian Niel Gonzales, tanan pumuluyo sang San Antonio, Brgy. Sum-ag, Bacolod City subong man si Joana Valero, 25 anyos ang edad, pumuluyo naman sang Fortune Town, Brgy. Estefania, Bacolod City.
Samtang ang mga nagkalapilasan naman amo sanday Mario Gonzales, 30 anyos, common law husband sang biktima nga napatay nga si Angelica, Mary Grace Castro, 24 anyos, pumuluyo sang Brgy. Sum-ag, Crystalyn Joy Palma, 22 anyos kag Gregyn Palma, 49 anyos ang edad tanan pumuluyo naman sang Burgos, Cadiz City.
Suno sa imbestigasyon sang Cadiz City Police Station may isa ka Isuzu Canter (GHP 518) nga truck nga nagadalagan halin sa sur padulong sa norte nga direksyon sang iya sini nabungguan ang nauna nga bahin sang isa ka tricycle nga magapauli na kon tani sa Bacolod.
Ang amo nga tricycle nga gina-maneho ni Mario Gonzales, amay kag bana sang napatay, ang aksidente naman na nakabunggo sa isa motorsiklo nga gina-drive naman ni Gregyn Palma kag angkas si Crystalyn Palma.
Una nga gindala sa Cadiz City District Hospital ang mga nasamaran apang sang ulihi, ini sila ang ginsaylo sa Bacolod.
Matapos ang insedente gilayon nga nagpalagyo ang driver sang trak nga ginapanag-iyahan ni Ramiro Diosana sang Bacolod City. /dyHB BACOLOD
