Roxas City, Capiz- Naglab-ot sa 856 ka mga kabataan sang mga benepisyaryo sang Pantawid Pamilyang Pilipino Program (4Ps) nga iskolar sang Expanded Student Grant Program for Poverty Alleviation (ESGPPA) ang nagtapos sa ila tagsa ka mga kurso subong nga tuig 2018.
Ginpahayag ni DSWD – Field Office 6 Project Development Officer Emilyn Apostol sa sinapol sang Provincial Convergence Committee (PCC) nga 6 ang magna cum laude samtang 45 ang cum laude sa mga nag-gradwar nga benepisyaryo sang ESGPPA sa siyam ka mga eskwelahan sang Capiz State University (CapSU) sa bilog nga probinsya.
Gindugang pa ni Apostol nga ginatinguhaan pa nga mabuligan nga maka-trabaho ang mga nagtapos sa kolehiyo nga kabataan sang 4Ps agud nga makabulig naman sila sa ila tagsa ka pamilya.
Nahibaluan nga ang programa ang nagahatag sang oportunidad sa mga kwalipikado nga kabataan sang benepisyaryo sang 4Ps nga mapadayon ang ila pag-eskwela sa kolehiyo agud nga makapangita sang mas maayo nga trabaho agud mangin mga produktibo nga indibidwal sang sosyedad.
Ang ESGPPA ang ginapatuman sang Commission on Higher Education (CHED) upod sa Department of Social Welfare and Development, Department of Labor and Employment kag mga state universities and colleges.
