MURCIA, NEGROS OCCIDENTAL – Bisan pa nagapati ang pamilya sang biktima nga ginaalegar naghikog sa banwa sang Murcia nga wala sang foul play sa natabo nga kamatayon sini, sa gihapon igapaidalum sa paraffin test ang iya bangkay agud madula ang pagduda.
Ang biktima nga si Clark Jumon Ginojala, 24 anyos ang edad, pumuluyo sang Had. Binitin, Brgy. Blumentritt, banwa sang Murcia ang ginaalegar nga naghikog pinaagi sa pagtiro sang iya kaugalingon mga las 2:05 kahapon sang hapon sa ila man lamang balay.
Suno sa imbestigasyon sang Murcia PNP, gintiro sang biktima ang iya kaugalingon pinaagi sa pagbutang sang armas sa iya bibig.
Nasapwan ang biktima sa sulod sang iya kwarto nga wala na sang kabuhi kag may pilas sa ulo.
Ginpahayag sang hepe sang Murcia PNP nga si Police C/Insp. Robert Indiape, ang biktima ang may ginatago nga problema personal kag isa ini sa ginalantaw nga motibo sa iya ginaalegar paghikog.
Nakuha sa crime scene ang isa ka kalibre .45 nga armas, isa ka slug nga naglapos sa ulo sang biktima subong man isa pa ka empty shell.
Nahibaluan nga ang biktima ang himata sang alkalde sang banwa sang Murcia nga si Mayor Andrew Montelibano./dyHB BACOLOD
