BACOLOD CITY – Nasapwan nga patay na ang isa ka biktima matapos nga ini siya ang gina-alegar nga naghikog sa sulod sang iya beauty salon sa Corner Lopez Jaena-Burgos Street, Bacolod City.
Ang biktima nakilala kay Ralph Limbaga, 49 anyos ang edad, pumuluyo sang Brgy. Alangilan kag temporaryo nagapuyo sa ginapanag-iyahan niya nga beauty parlor nga amo ang Red Palm Salon.
Si Ralph ang nasapwan sang iya mga kaupdanan nga nagahandusay na sulod sang CR kag may igo sang bala sa iya ulo pasado las 9 kagab-i.
Suno sa pagpangusisa sang Police Station 4, ginalantaw nga motibo sa paghikog sang biktima amo ang financial problem kasunod nga antes sang insidente, may nagpadulong sa iya parlor nga abogado upod ang 5 ka iban pa nga mga tawo.
Pahayag sang mga kaupdanan sang biktima nga sadtong November 2017 nagbuko naman gali nga maghikog si Ralph bangud sang iya problema kon diin plano niya kuntani nga ibaligya na lang ang iya salon.
Na-recover sang mga utoridad sa scene of the crime ang isa ka .45 calibre nga pistol kag bala sini nga amu gingamit sini para utdon ang iya kabuhi.
Sa pihak nga bahin, wala naman nagapati ang amay sang biktima nga si Felipe Limbaga nga naghikog ang iya bata bangud wala man siya sang may nakita ukon nahibaluan nga may armas ang biktima./dyHB BACOLOD
