NEGROS OCCIDENTAL – Isa ang patay kag 11 ang nasamaran matapos naigo sang kilat sa separado nga mga insidente nga natabo sadtong nagligad nga Lunes kag kahapon sang hapon sa Cadiz kag Bago City.
Una nga insidente natabo sa ciudad sang Cadiz kon diin napatay ang biktima nga si Josefino Perez, 56 anyos ang edad, pumuluyo sang Brgy. Bonifacio, Cadiz City.
Suno sa report, Lunes sang hapon sang buot na kuntani nga magpauli sa ila balay ang biktima sang gulpi lang nga naglain ang panahon kag hinali nga nagpangilat.
Naigo ang biktima bangud sang tuman ka baskog nga boltahe dala sang kilat kon diin nagkalagisi gid ang iya sini nga pantalon.
Samtang ang ikaduha naman nga insidente natabo may mga las 2:30 kahapon sang hapon sa Sitio Pandan, Brgy. Ma-ao, Bago City kon diin onse ka napilasan, kalabanan diri mga bata sang naigo sang kilat ang isa ka kapilya kon diin ginapatigayon ang Flores de Mayo.
Suno sa report, yara sa sulod sang kapilya ang mga biktima nga sanday Mary Ann Bernasol, 29 anyos, Rosie Chu, 42 anyos kag Ritchie Mancia, 27, tanan pumuluyo sang amo nga lugar, samtang ang nabilin nga mga biktima ang lunsay menor de edad nga nagtambong sa Flores de Mayo.
Pagpalamungol kag pagpalaminhod sang lawas ang ginbatyag sang mga biktima bangud sang kuryente nga dala sang kilat./dyHB BACOLOD
