BACOLOD CITY – Nagnubo sang kapin 44.44 percent ang krimen sa ciudad sang Bacolod as of January 2018.
Base sa record sang Bacolod City Police Office, may kabug-usan nga 99 ka krimen ang na record sadtong January 2017 samtang 55 gid lamang ang krimen nga natabo sa bulan sang Enero sini nga tuig.
Suno sa OIC City Director Francisco Ebreo nga ang daku nga pagnubo sa crime volume ang bunga man sang padayon nga evaluation sang mga nagaluntad nga krimen sa ciudad sa tagsa ka semana pinaagi sa Enhance Managing Police Operation ukon EMPO.
Pahayag pa ni Ebreo nga ang pagnubo sang krimen sa Bacolod ang bangud man sang mas ginpabakud nga stratehiya sa pagpadala sang tanan nga available nga resources upod sa suporta kag kooperasyon sang tanan nga natungdan ilabi na gid police visibility kag massive checkpoints.
Sa pihak nga bahin, nagsaka naman sang kapin 86.84 percent ang mga operasyon nga ginapatigayon sang pulis sini nga January 2018 ukon 33 ka mga operasyon kon ikumparar sang January 2017.
Ini nga mga operasyon ang ginpatigayon angut sa illegal gambling, RA 10591 kag RA 9165 ukon Comprehensive Dangerous Drugs Act of 2002.
Angut sini, ginapasiguro sang Bacolod City Police Office ang padayon nila nga kampanya sa crime prevention, pag-mintenar sang peace and order para mas mangin hilway pa gid kag safe ang ciudad sang Bacolod sa bulig sang pumuluyo./dyHB BACOLOD
