BACOLOD CITY – (1st Update) Kretikal subong ang isa ka lalaki nga nagsunog sang iya kaugalingon matapos napuhag sang nagpatigayon sang raid ang gintingob nga pwersa sang mga operatiba sang PNP, PDEA kag CIDG sa Purok Rosan Pandan kag Paraiso, Sitio Sibucao, Barangay Banago kaina sang aga.
Nakilala ang lalaki kay Roberto Rodriguez, 37 anyos, soltero, pumuluyo sang amu man nga lugar nga nagpaligo sang gasolina sa iya lawas kag ginsindihan nya ini.
Resulta, nag-angkon sang third degree burns si Rodriguez, napuno sang paso ang halos bilog niya nga lawas kag gindala sa Corazon Locsin Montelibano Memorial Regional Hospital.
Si Rodriguez ang ginasiling isa sa mga bata bata sang drug personality sa lugar nga si Rammy Poja sa diin sang ginsulod ang iya balay may mga nakuha man ang otoridad (bantayan ang pila ka nga recoveries).
Sa inpormasyon, Istilo ini sang mga nagasuporta kay Poja para matunga naman ang atensyon sang operatiba sa diin may napaso man nga agent kag subong ara sa ospital. May ara man sang nagpalupok sang lima ka kwitis bilang senyales nga may mga pulis na sa palibot.
Target gid sang mga otoridad amu si Poja, isa ka kilala nga drug personality kag ginbansagan nga high value target (HVT) sa Bacolod kag supplier sang shabu sa pila ka lugar sa syudad./ Photo: Itsura ni Rodriguez antis ini gindala sa ospital matapos nga nagpaligo gasolina kag ginsendihan ang kaugalingon
