NAGPASILONG SA KAMALIG | Apat nga napatay sa kilat tuparay pungko

PONTEVEDRA – (2nd Update) Nagapasilong sa isa ka kamalig sa uway -uway nga sakop sang Hacienda Carmenchica ang mga nagatrabaho sa kampo sang tubo sang Hacienda Carmenchica, Barangay Don Salvador Benedicto, Pontevedra sang nagkalaigo ini sang mabaskog nga kilat pasado las 3 sini nga hapon.

Basi sa pahayag sang imbestigador sang Pontevedra PNP nga si SPO2 Sornito nga apat ang on the spot ang napatay nga amo sanday Rubilyn Muedan, 41, Glenn Gutual, 42 kag Marites Garzon, 52, tanan pumuluyo sang Hacienda Carmenchica kag Renilda Villanueva, 51, sang Sitio Colonia.

Ang apat natigayon pa nga madala sa Valladolid District Hospital apang wala na sang kabuhi.


Samtang ang mga nasamaran kag nakaagum sang paso amo sanday Lenlyn Subong, 39 kag Romel Subong sang Sitio Cahil, Barangay Don Salvador Benedicto, Marites Cabalida kag Lito Cabalida, mag iloy nga sanday Roberta Tiayon, 62, kag duha nya ka bata nga sanday Ronald kag Roland Tiayon.

Basi sa panaysayon ni Roberta Tiayon sa interview sang DYHB RMN Bacolod, dira sila sa payag nagpanyaga kag sang mga la una na, nagbalik ini sila obra sa kampo.

Apang tungod kay daw matupa ang madamol nga ulan, nagpasilong ini sila sa payag.

Sang nag tupa na ang ulan, nagatinuparay pungko ang apat nga napatay lakip na si Roberta apang tungod nagapangilat, naghalin ini sa birha kag nagpungko sa duta.

Nakibot na lamang ini sang pagpangilat nga ang apat nga nagapungko gulpi lang natumba kag sya man nagtabog gikan sa iya ginapungkuan kag nagtupa sa kalog.

Tigayon nga nakabangon ini matapos nga ginbuligan sang iya 2 ka bata kag nagdalagan sa kakulba, apang namarasmasan ini sang ginhambalan sang iya bata nga safe na sila.

Sa karun nakapauli na ang mga nasamaran nga ginbulong sa La Carlota City Hospital kag Valladolid District Hospital samtang ang mga napatay yara na sa Abe Funeral Homes sa Pontevedra.

Facebook Comments