BACOLOD CITY – Naigo sang “indiscriminate firing” ang isa ka bystander mg alas 11:50 kagab-i sa Gallardo Street, Brgy. Villamonte, Bacolod City.
Nakilala ang biktima nga si Silveno Gallardo, 36 anyos ang edad, single kag pumuluyo sang amo nga lugar.
Base sa imbestigasyon sang Police Station 4 sa pagpamuno sang hepe sini nga si P/Cinsp. Ritchie Gohee, may tatlo ka mga suspek nga nagasakay sa isa ka motorsiklo kag hinali na lamang nga nagpalupok sang wala matumod nga armas.
Isa sa mga suspek ang ginkilala sang pila ka mga nakakita nga amo si Bebe Agsam nga suno sa ila, ini siya ang nagpalupok sang armas kag aksidente nga naigo ang bystander nga si Silveno.
Nag-angkon sang igo sang bala sa iya tuo nga tikod ang biktima kag dali-dali nga gindala sa Doctor’s Hospital.
Samtang, natigayon naman nga ma-recover sang pulis ang lima ka mga baseyo halin sa armas nga gin-gamit palupok sang suspek.
Nahibaluan nga ang mga suspek gilayon nga nagpalagyo padulong naman sa direksyon sang BS Aquino Drive./dyHB BACOLOD
