BACOLOD CITY – Aksidente nga nabun-an ang isa ka amay nga nagtuyo gid lamang kuntani nga magtambag sa away sang iya bata nga babayi kag lalaki kahapon sang hapon sa Brgy. Pta. Taytay, Bacolod City.
Nakilala ang biktima nga si Godofredo Burlas, 63 anyos ang edad, pumuluyo sang Purok Maabi-abihon, Brgy. Pta. Taytay.
Suno sa imbestigasyon sang pulis, may mga la 1:10 kahapon sang hapon, nag-away ang mga kabataan ni Godofredo nga lalaki kag babayi.
Ginpahayag sang biktima nga sang nakita niya nga buot nga bun-on sang iya anak nga lalaki ang manghod sini nga babayi, dali-dali siya nga nagpalapit kag nagtambag, apang siya ang naigo.
Napilasan sa iya wala nga kamot ang biktima gani gindala ini sa Corazon Locsin Montelibano Memorial Regional Hospital./dyHB BACOLOD
