General Santos City–Gipalawman pa karon sa kapulisan ang ginahimong imbistigasyon kabahin na sa nahitabong pagpanungab sa usa ka negosyante nga si Romie John Rupinta, 28 anyos, ug nanimuyo sa Zone 8, Barangay Bula ning syudad alas 8:00 pasado ang takna sa gabie gawas sa 7/11 nga nahimutang sa J. Cotolico St. Barangay Lagao.
Sumala pa ni Police Major Rexor Canoy ang tigpamaba sa GSCPO nga gina-review na sa kapulisan ang mga CCTV camera nga nakamontar sa maong lugar aron nga masayran ang diskripsyon sa mga suspect nga gilayong misibat human sa maong panghitabo.
Dugang pa ni Major Canoy nga gawas sa pagpangholdap ginatan-aw usab sa kapulisan karon ang uban pang anggulo nga posibleng motibo sa maong pagpanunggab.
Dugang pa ni Canoy nga kung tan-awon matud pa cellphone lang ang gikuha sa mga suspect ug dili pa gyud latest nga model.
Nasayran nga nag lingkod lang ang biktima sa maong lugar ug giduolan kini sa suspect nga nagsakay sa usa ka tricycle dayon gidungab sa likod nga bahin gamit ang hait nga hingniban dayong kuha sa cellphone ug sakay balik sa tricycle ug misibat sa wala matinong direksyon. (Dave Silagan)
