TACLOBAN CITY – Padayon la gihapon nga ginbibiling han mga otoridad an naka-eskapo nga inmate ha Basey Sub-Provincial Jail matapos mambuno ngan mamusil ha sulod han mao nga presuhan.
An suspek in gin-tutuohan nga nagtatago ha kabukiran han Brgy. Tingib ngan Brgy. Bacubac han Basey, Samar. Sumala ha pamilya han suspek, andam sumurrender an suspek pero kan Basey Mayor Atty. Junjie Ponferrada la. Dayon naman nga nag-request an otoridad kan Mayor ha pag-surrender han suspek pero waray man ini magpakita ha lugar ngan oras nga ira gin-sabutan.
Ha record han korte, ginkilala an naka-eskapo nga hi Jonathan Duran Ibanez, 38 anyos, nga residente han Brgy. Caticugan Santa Rita, Samar nga anay nakapaslak ha Basey Sub-Provincial Jail ha kaso nga frustrated murder ngan frustrated homicide.
Armado an suspek matapos kuhaon an mga armas ha sulod han kwarto han mga jail guard. Nakuha niya an usa nga shot gun nga may 9 live ammos, ngan usa nga calibre 38 nga may sulod nga 5 nga live ammos.
Tulo naman nga preso, duha nga jail guard, ngan usa nga civilian an nasamaran ngan usa an kompirmado nga namatay ha mao nga panhitabo.
Nagpapadayon la gihapon manhunt operation nga ginbubuhat han Basey PNP, Samar Provincial Police Office para han posible nga pagkaaresto han suspek.
