BACOLOD CITY – Ginahulat sa karon ang desisyon sang pamilya sang nabungguan kag napatay nga mag-amay kahapon sang aga sa Buri Road, Brgy. Mandalagan, Bacolod City kon bala may settlement nga matabo sa tunga nila ka sang driver sang awto nga nakabunggo diri.
Ini matapos nga nagpadulong na sa Police Station 3 mga las 10 sini gid lamang nga aga ang driver sang Kia Rio nga nakabunggo sa mag-amay nga amo si Catherine Rea Yanson, pumuluyo sang Country Homes Subdivision, Brgy. Estefania, ciudad sang Bacolod.
Suno sa PS3 nga nagpatunda kaina sang aga ang pamilya ni Yanson nga willing ini nga mag-surrender gani ginkadtuan ini sang police sa iya balay agud sugaton.
Nag-abot si Yanson upod ang iya bana sa estasyon sang pulis kon diin nagsugilanon sila sang pamilya sang napatay nga sanday Dante Lascuña, 44 anyos kag Rendel Lascunña, 6 ka tuig ang edad, pumuluyo sang Purok Carmencita, Brgy. Mandalagan.
Madumduman nga pasado las 6 kahapon sang aga nabungguan sang salakyan nga Kia Rio nga gina-maneho ni Yanson ang mag-amay sa Buri Road, Mandalagan.
Nahibaluan nga wala nagpundo ang salakyan matapos ang pagkabunggo, apang bangud nga may naka identify sang salakyan kag nabilin ang parti sini, ini ang gilayon nga natultulan apang sang nagpadulong ang pulis sa iya balay, wala si Yanson didto.
Na-angkon sang patal nga pilas ang mag-amay nga amo ang gintunaan ang ila kamatayon./dyHB BACOLOD
