Mokabat sa 24 ka mga indibidwal ang nadakpan sa paglapas sa Liquor Ban dinhi sa dakbayan sa Butuan nga gipatuman sa Commission on Election (COMELEC) sulod sa 48 oras nga nagsugod alas 12 sa tungang gabie kagahapong adlawa.
Unang nadakpan ang 20 ka mga indibidwal nga nag-inom sa Masao beach sa Brgy. Masao ning syudad sa Butuan human mitambong sa alumni reunion sa Agusan del Norte National High School.
Nadugangan ug laing 4 ka mga indibidwal nga nadakpan usab sa paglapas sa Liquor Ban diin nasapon sa kwerpo sa kapulisan nga nag-inom ang upat ka mga batan-on didto sa P-3, Brgy. Pianing sakop ning syudad sa Butuan.
Mag-atubang sa kasong paglapas sa COMELEC Resolution 10461 ang 24 ka mga indibidwal kinsa posibleng mabilanggo sa dili moubos sa 6 ka tuig ug pynsa nga mobalor sa 60,000 pesos.
Gipasabot ni P/Capt. Emmerson Alipit, spokesman sa Butuan City Police Office (BCPO) nga ang katuyuan sa pagpatuman sa Liquor ban aron magpabiling malinawon ang pagpahigayon sa eleksyon.
Nag-awahg ang opisyal sa mga katawhan nga daling mosumbong sa mga otoridad kung adunay mabantayan nga nakalapas sa nasangpit nga balaod. [image: liquor ban 2.jpg]
Si P/Capt. Emmerson Alipit, spokesman sa Butuan City Police Office (BCPO) sa iyang pamahayag sa interview sa RMN DXBC Butuan.
