Nakaparadang truck nga nabanggaan sa single motor nga gikamatay sa drayber, kulang og early warning device

Kulang matud pa og early warning device ang nakaparadang truck nga nabanggaan sa usa ka single motor kinsa gikamatay sa drayber niini pasado alas 8 sa gabie adtong Miyerkules didto sa Purok-5, Barangay Kiburiao, Quezon, Bukidnon.

Giila ang biktima nga si Lawrence Casama, 22 anyos, ulitawo, ug residente sa Purok-Demokrasya, Salawagan, sa naasoy nga lungsod kinsa nagmanehu sa usa ka Suzuki Raider nga single motor.

Samtang ang nakaparadang truck nga nabanggaan sa single motor usa ka Nissan Truck with Tractor Head, nakarehistro sa DOLE Philippines Inc, ug gimanehu ni John Paul Honasan, 30 anyos, ulitawo, ug residente sa Purok-3B, San Francisco, Panabo, Davao Del Norte.

Sa report nasayran, nga gadagan gikan sa Barangay Tugas, Quezon, Bukidnon ang maong single motor ug papaule na kini sa iyang pinuy-anan, sa dihang pag-abot sa lugar, gumikan sa kakulangon sa early warning device, wala niini mabantayi ang giparada nga truck kilid sa dalan hinungdan sa pagbangga.

Gumikan sa kakusog sa impak, nakaangkon og nagkadaiyang pangos ug bun-og sa kalawasan ang biktima nga gisuwayan pa og dala sa balay-tambalanan apan gideklara ng dead-on-arrival sa doctor.

Gikustodiya karon sa Quezon Municipal Police Station ang drayber sa truck alang sa tokmang disposasyon.