SAGAY CITY – (2nd Update) Nakit-an na kahapon pasado la una, Enero 29, ang bangkay ang isa ka driver sang habal-hanal nga ginkilala kay Jonathan Sun, 50 anyos, sang Purok Mabinuligon, Barangay Makiling matapos naanod sa suba sang nagligad nga Sabado (Enero 27) pasado las 3 sang hapon.
Nakita ini mga 300 metros halin sa overflow nga iya ginlunuran. Wala naman nakit-ang iya motor nga amu naman ang ginagamit nya sa iya palangabuhian.
Si Sun isa ka habal-habal driver nga nagabyahe naman Barangay Makiling padulong sa Barangay Puey vice-versa.
Natabo ini sa overflow nga nahamtang naman sa Barangay Puey sa diin papuli na ini kon tani sa Barangay Makiling sang sya ang nagtabok bisan pa nga mabaskog ang current sang tubi sang Himogaan River.
Suno sa mga saksi, nakit-an pa nga makapila ka beses nga nagbutwa si Sun apang bangod kay mabaskog kaayo ang ilig sang suba, malayo ang iya natup-an tubtob nga wala na ini nakit-an.
Sang July 14, 2017, duha man ang napatay matapos nga naanod ang habal-habal overflow sa Barangay Bato, nga ginamaneho Clodualdo Abisamis, 58 anyos sang Barangay Baviera sa diin napatay man ang iya angkas nga maestra nga si Maam Rona Beleganio, 23 anyos sang Barangay Himogaan Baybay kag nagatudlo sa Shermahill Integrated School. / Contributed photo of Himogaan River overflow
