SILAY CITY – Paghinulsol kag nakonsensya ang kalive-in nga si Rogelia Landao, 44 anyos, ang rasun kon ngaa nga ini siya ang nagsungka sa pulis kag gintum-ok ang iya umagad nga adik nga amu naman ang nagbuno, labo kag nagsunog kay Antonio Padua, 63 anyos kag bata sini nga si April Re-Ann, pito ka tuig.
Suno kay Rogelia, nabatian nya pa ang iya bata nga nagsinggit nga ‘Mamang’ sang ini ang ginbuno-buno sang iya umagad nga si Arnel Aguilar, samtang ini ang siya nagpalagyo kag nagpanago sa kasagingan sang iya nakit-an una nga ginbuno buno man ang iya live-in si Antonio.
Para kay Rogelia, wala sa plano nila sang iya umagad nga patyon ang mag-amay bangod ang ila manlang amu nga kuhaon ang kwarta nga mga P20,000 nga parte ni Antonio sa pagpatapas sang tubo.
Apang ang P20,000 ang wala pa gali sa kamot ni Antonio bangod gindeposito pa ini niya sa banko.
Ang pagdeny ni Antonio nga wala ini sang kwarta, kag nadeposito na sa Bank of Marayo amu ang nagtulod kay Arnel nga patyon ini paagi sa pagbuno kag paglaslas sa liog. Apang namutikan sini nga may bata sa isa ka hulot kag nagakatulog sa katre rasun nga iya man ini ginpatay paagi sa paghatok-hatok sang buno kag gingutrab pa ang liog.
Ginguyod pasulod sa sala ni Arnel halin sa balkon ang patay nga lawas ni Antonio kag ginsampaw ang patay nga lawas sang bata kag ginsunog gamit naman ang ila mga panapton. Natabo ina mga malapit las 9 sang gab-i sang Lunes sa diin mga las singko na sang kaagahon nasapwan ang sunog nga lawas sang duha sang manugpahalab karbaw nga si Michael Ocbina.
Pero antis pa man sina, Domingo gintawgan ni Arnel si Rogelia kag ginpabalo nga may kwarta si Antonio. Dira na nga ginplanuhan sang duha ang pagkuha.
Lunes mga pasado las 6 sang gab-i, kaadlawan sang bata nga si Re-Ann nagtawag si Rogelia kay Antonio, nag greet pa ini sang ‘Happy Birthday’ sa iya bata, dala man pabalo ni Re-Ann sa iya iloy nga nalipay gid siya sa ginhanda ni Tatay niya nga tiil sang manok. Nagpabalo man ang iloy magakadto ini sa Hacienda Pula sa sina nga gab-i.
Likom sa ihibalo sang mag-amay may iban gali nga tuyo si Arnel kag Rogelia, indi para magtambong sang birthday kondi kuhaon ang kwarta.
Mga las 8 pasado Lunes sang gab-i na nag-abot ang duha sa Hacienda Pula, bangod wala na naga-upod sa isa ka balay si Rogelia kag Antonio madugay na, kag may bag-o na gani ini nga ka-live in nga ginkilala kay Lomar Maravilles nga isa man ka manugpatdan. Si Arnel, 29 anyos ang nagapuyo sa Hacienda Napilas 7, Barangay E. Lopez ang bulag naman sa bata ni Rogelia bangod sa isyu nga nagagamit sang druga ang umagad.
Naabtan sang duha si Antonio nga nagapanigarilyo sa guwa sang balkonahe kag didto nag-uluistorya parte sa kabuhi ni Arnel nga nagsiling, luyag sini kon tani nga makigbalik sa iya manak. Wala man sang dangtan ang istorya, bangod si Antonio man mismo ang indi magpasugot nga magbalikay sila sa rasun nga kasakitan gid lamang ang naagom sang babaye sa iya kamot kag ugtas bangod sa padayon sini nga bisyo sa druga.
Hinali lang nga ginsingit ni Arnel ang parte sa kwarta, dala siling nga ihatag ini sa ila. Apang nagdeny naman si Antonio bangod ang matuod, wala na ini sang kwarta bangod na deposito na gani sa banko.
Dira na nagasugod ang kremin sa diin sang gin-usisa sang mga otoridad ang crime scene, patal nga pilas ang naagom sang duha.
Si Antonio ang may laslas ang liog, sunog ang paa, kamot, ulo kag halos bilog nga lawas. Hatok hatok nga buno ang naagom sa iya nga dughan.
Si Re-Ann naman ang may patal nga pilas sa tyan paagi sa paglabo, laslas man ang iya nga liog kag sunog sa iya mga kamot, ulo kag tiil. Nakit-an ini nga nagahapaon sa ibabaw sang iya amay. Wala naman ini sang underwear, sa diin nakit-an nalang ang iya panty sa iya uluhan.
Sa interview sang dyHb sa iloy, wala nya man nakita nga ginlugos ang iya bata, bangod sang amu nga tion, gin nerbyos ini sa ginhimo ni Arnel sa mag-amay. Nagpanago lang ini sa kasagingan.
Naghinulsol siya bangod nasilaw ini sa kwarta nga ginbunit ni Arnel sa iya sa diin ang resulta, isa ka makasiligni nga kremin nga nag-utas sang kabuhi sang tawo nga iya ginpalangga sadto, kag kabuhi sang iya mismo bata nga babaye.
Bangod sa pagsurender ni Rogelia, las 10 kaina sang udto gindakop man sang Silay PNP si Arnel nga nagpanginwala sa kremin.
Suno kay Arnel wala siya nakakadto sa Hacienda sang Lunes sang gab-i kag ara gid lamang ini sa ila balay sa Barangay E. Lopez.
Gin-inbita man sang kapulisan si Lomar para mahibaluan kon may may kaangtanan man ini sa kremin.
Nagasugid ayhan sang matuod ang iloy? May ara sang inconsistency nga naobserbahan ang dyHB bangod una nagpahayag ang iloy, nga wala ini nakatambong sa birthday sang iya bata sang April 23 bangod may obra ini sa sulod sang balay sa Carmela Valley. Subong ginsiling nya nga nagkadto siya sa amu nga gab-i, upod kay Arnel.
Matuod bala nga ginlugos ang bata? Matuod bala nga upod man sa amu nga gab-i si Lomar? Kon indi mag-ako si Arnel sa kremin, sin-o ang may kahimuan? Si Lomar ayhan nga bag-o lang nakaupod sa pangabuhi ni Rogelia?
Bantayan ang kasugpon sang imbestigasyon sang dyHB.
