Patay ang anum ka tuig nga bata matapos malumos sa ginakutkot nga drainage canal sa Barangay Capaliz, Dumangas, Iloilo pasado alas 6 sang Sabado sang aga.
Ginkilala ang biktima nga si Will Jay Zamora, sang amo man nga lugar.
Ginpahayag ni Police Chief Inspector Rene Obregon, hepe sang Dumangas PNP nga mga alas sang Sabado sang aga kaupod sa iban nga mga kabataan, naglagaw-lagaw ang biktima kag aksidente nga nahulog sa ginakutkot nga drainage canal nga puno sang tubig bangud sang pag-ulan.
Bangud sini, nalumos ang biktima apang wala gilayon ginpabalo sang kaupod sini nga mga kabataan ang mga ginikanan sini.
Mga alas 7 na sang aga sang ginsugid sang mga kabataan ang natabu sa biktima kabangdanan dali-dali nila nga ginkuha sa nalumsan sini nga drainage canal kag gindala sa ospital apang gindeklarar nga dead on arrival.
