BACOLOD CITY – (1st Update) Bangud sang kapigaduhon kag nagabalatian nga bata, napilitan nga magpangawat kuntani ang isa ka gwardiya pasado la una sang kaagahon sa Purok 5, Brgy. Granada diri sa ciudad sang Bacolod.
Ginsulod sang suspek nga si Sandy Sevilla, 27 anyos ang edad, tumandok sang Brgy. Buenavista, Escalante City kag temporaryo nga naga-puyo sa Hacienda Carmen, Brgy. Granada upod ang iya live-in partner ang puluy-an sang biktima nga si Nunistell Mae Fulo, legal ang edad, isa ka artist/painter kag model kag residente sang amo nga lugar.
Suno sa imbestigasyon sang Police Station 5 sa pagpamuno sang hepe sini nga si C/Insp. Sherlock Gabana, gin-ako ni Sandy ang krimen kon diin ginsiling sang suspek nga pasado la una kaina sang kaagahon, nagsulod na siya sa compound sang balay sang biktima kag nagpanago lang ini banyo nga ara sa guwa sang balay.
Pasado las 6 sang nag-gwa ang biktima nga si Nunistell agud magsulod sa banyo gani nagkitaay gid ang ila banas sa sulod.
Nakibot ang biktima gani ini ang nagsinggit rason nga ginbuno na lamang ini sang suspek sang kapin 6 ka beses.
Madason nga ginbuno ni Sandy ang kabulig sa puluy-an nga si Mary Grace Muboda sang duha ka beses apang ini ang nakapangayo pa sang bulig sa ila mga kaingod.
Gilayon nga nagpalagyo ang suspek apang bangud man sang bulig sang mga kaingod nga nakakita sa iya, madasig ini nga nadakpan sang utoridad.
Sa interview sang DYHB kay Sandy, ginsiling niya nga napilitan siya nga magpangawat kuntani bangud wala ini sang kwarta nga iga-gasto sa 8-ka bulan niya nga anak nga babaye nga una na gindala sa ospital bangod sa LBM.
May trabaho man kuntani bilang isa ka security guard sa isa ka dormitory sa 18th Street Lacson si Sandy apang ini ang suspendido sa sulod na karon sang isa ka bulan bangud masami ini nga late magsulod sa trabaho./dyHB BACOLOD
