BACOLOD CITY – Ginbuno sang gunting sang isa ka babayi ang iya nobyo bangud gid lamang nga wala ini siya ginsapak kagab-i sa ila balay sa isa ka barangay diri sa ciudad sang Bacolod.
Ang biktima isa ka 25-anyos nga lalaki, kasado kag pumuluyo sang isa ka barangay diri sa Bacolod, samtang ang suspek amo man lamang ang iya nga nobya.
Suno sa report, nag-abot ang amo nga lalaki sa ila nga balay, apang wala niya ginsapak ang iya nobya.
Bangud sini, naakig ang babayi gani nagkuha ini sang gunting kag ginbuno ang lalaki.
Naigo sa iya ilok kag nabagrasan ang guya sang biktima nga padayon karon ginabulong sa isa ka ospital diri sa ciudad.
Base naman sa pagpangusisa sang pulis, ang lalaki ang kasal sa iban nga babayi, gani ginaalegar nga nulu-nobya ukon kerida niya ang amo nga babayi.
Ini ang rason sa paghinago gid lamang sang ngalan sang mga tawo nga involved para sa proteksyon sang ila tagsa ka pamilya./dyHB BACOLOD
