CADIZ CITY, NEGROS OCCIDENTAL – Natiruhan sang isa ka katapo sang Civilian Volunteers Organization ukon CVO ang isa ka ginaalegar kawatan kaina sang kaagahon sa area sang COMPAC 4, Crossing FI, Brgy. Cabahug, ciudad sang Cadiz.
Ang biktima wala pa nakilala sa karon, samtang ang suspek naman nakilala kay Joan Banhao, 29 anyos ang edad, isa ka miembro sang CVO kag pumuluyo sang Purok Crossing FI, Brgy. Cabahug sang amo nga ciudad.
Suno sa Cadiz City Police Station, may mg alas 3:50 kaina sang kaagahon, personal nga nagkadto sa ila estasyon ang retired PNP nga si Jessi Lucero agud ipabalo nga may natabo nga tiniruhay sa amo nga area.
Base sa imbestigasyon sang pulis, natiruhan sang suspek ang biktima matapos niya ini nadakpan sa akto nga nagapangawat sang battery sang isa ka salakyan.
Ginpahayag ni Banhao nga ang biktima ang may armas nga .38 calibre nga revolver kag ini sila nga duha ang nagpukutay.
Durante sang insidente, suno sa suspek aksidente niya nga naigo ang biktima sa iya nawong.
Dali-dali pa kuntani ini nga gindala sa Cadiz City Emergency Clinic apang gin-pronounce na nga dead on arrival sang attending physician./dyHB BACOLOD
