General Santos City—sikop sa operatiba sa Police Station 7 ang 2 ka mga suspetsadong responsabli sa pagpangwat sulod sa usa ka simbahan sa may Barangay Fatima Gensan, alas 5:00 ang takna sa hapon, adlawng Martes, August 29, 2017.
Giila ang mga suspek nga silang si Claude Ponce, 34, laborer, residenti sa Barangay Fatima ug Arnel Olama, 27, residenti sa Purok, Alquizar, Barangay Apopong, ning syudad.
Nasikop ang mga suspek human nga ilang giransack ang Savior Fellowship Church nga nahimutang sa Employees Village, Barangay Fatima. Gikuha sa mga nahisgutan ang duha ka stereo speaker nga iyaha sa maong simbahan dayon gikarga sa usa ka tricycle nga dunay plate no. MC-1568 dayon misibat palayo sa lugar padulong sa Purok 11-A, Barangay Fatima.
Swerti lang nga dunay nakakita sa gihimo sa mga suspek kansa maoy nireport sa buhatan sa Police Station 7.
Gilayon nga gihimo ang hot pursuit operation nga miresulta sa pagkasikop sa mga suspek. Malampuson usab nga narekober ang mga butang nga gikawat sa mga suspek.
Sa karon ginaandam na ang pagpasang-at ug kaso batok sa mga nahisgutan ug gihuwat nalang ang desisyon ni pastor Felimon Valenzuela kung pasakaan ba niini ug kaso ang suspek.
