Napatay na hepe nan NFA Surigao del Norte taghaya na, pipila ka kilaya nakurat ug nahanugon
Taghaya na sa isa ka punerarya sa dayan Borromeo, Surigao City an napatay sa aksidente, an Prov’l Head nan National Food Authority na si Gleen Plaza Echin, 57 anyos.
Kon kahinumduman, adton Sabado sa may ala-1:20 sa hapon sa may Purok 1, Brgy. Boyongan, Placer nakasugat ini nan aksidente sa dihang an tagmaneho na SUV na may plate no. ACB 6517 an mibangga sa kasugat na truck na may plate no. ACD 1756 na tagmaneho nan driver na nakilay-an na si Jessie Casas, 44 anyos, netibo na taga-Dinagat Island. Nadaya pa sa isa ka hospital si Echin pero nakutluan nan kinabuhi resulta sa grabe na mga bun-og ug samad sa lain-laing bahin sa lawas. Sa kakusog sa impact sa pagbangga, nolatay pa an ligid sa truck didto sa atubangan na bahin sa SUV labi na sa bahin na tag-inkuran, tagmanehuan ni Echin.
Namahayag an Chief of Police nan Placer na si Chief Inspector Ronald Almaden, sa pag-responde nan ila mga imbestigador didto sa tagkahitabuan, naka-istorya nila an driver na si Casas ug tag-asoy an panghitabo na kasugat nija an sakyanan ni Echin. Sa bersiyon niini na an SUV an nokawat sa lane ug diretso na mibangga ngadto sa ija tagmaneho na truck. Pipila ka oras na tagtanggong si Casas sa PNP Placer pero human an reglamentary period an nabuhian ini kahapon alas 9;00 sa buntag, ini human na an kalumunan ni Echin an mipadayag sa kapulisan na ipailayom na lamang sa regular filing an pagsang-at nan kasong Reckless Imprudence resulting to Homicide sunod na mga adlaw labi na kay nagbangutan pa an ila pamilya sa panghitabo.
Sa kalit na pagkawaya ni Echin, maarang na mga kaibanan sa trabaho sa NFA lakip an mga kilaya an nakurat ug naanugon sa kinabuhi nan Prov’l. Head sa waya damha na disgrasya.
