BACOLOD CITY – Nabiktima sang pickpocket ang isa ka makaluluoy nga lola samtang ini ang nagapili sang uniporme para kuntani sa iya apo kahapon sang hapon sa Bacolod downtown area.
Nakilala ang biktima nga si Arlene Bravo, 64 anyos ang edad kag pumuluyo sang Brgy. Handumanan, Bacolod City.
Suno kay Lola Arlene nga may mga las 5:30 kahapon sang hapon, samtang nga ini siya ang nagapili-pili gid sang uniform sa isa ka balaligyaan sa dalan Luzuriaga, nga para kuntani sa iya apo, nadiskubrehan na lamang niya sini nga bukas na ang iya bag kag wala na ang iya wallet.
Lakip sa nadula kay Lola Arlene amo ang mga importante nga ID kag ang cash nga kapin P3,500 pesos nga amo kuntani ang iya inugbakal sang uniform.
Bangud sini, nagakasubo nga nagpadulong sa Police Station 1 si lola agud ipa-record ang natabo sa iya./Marques de Buglas photo
