By: Joanna Ricote
Nadakop sa mga otoridad ang napulo ka mga tawo nga illegal nga nangisda.
Ang mga suspect naila sa ngalan nga sila Loyd Adlaon, 34 anyos, Jeremie Antiquina, 26 anyos, Leo Panto, 28 anyos, Roberto Carillo, 49 anyos ug Dexter Carillo, 25 anyos nga mga residente sa Brgy. Tabon, Jose Dalman, Zamboanga del Norte.
Nasayran nga sapon kini nga nagsakay sa usa ka motorized banca nga adunay marking nga MB Precious ug illegal nga nangisda sa Brgy. Calamcam, Talisayan Misamis Oriental.
Alas 10 sa gabie niadtong Marso 7, dihang nagpahigayon og seaborne patrol operation ang 1004th Maritime Police Station, Regional Maritime Unit 10, nga gilangkoban nila SPO1 Yusop Balahim, PO2 Dante Sarate, ug PO1 Eldrid Rivera, kauban ang mga personahe sa Talisayan Municipal Police Station, nga gilangkoban nila PO2 Cezar Obejero, ug PO1 Joemar Lingo-lingo ug mga Deputized fish warden nga sila Lito Semene ug Danilo Dalay.
Samtang, laing motorized banca ang namatikdan sa maong grupo nga adunay marka nga Berhin del Carmen ug illegal nga nangisda sa parehong lugar.
Sakay niini ang mga mangingisda nga naila sa ngalan nga sila Peter Denlon, 44 anyos, Al Dixon, 24 anyos, Jimmy Yanag, 28 anyos, Romnick Galario, 26 anyos, ug Noel Maco, 32 anyos nga mga residente sa San Jose Talisayan, Misamis Oriental.
Ang maong mga suspect ang detenado sa Talisayan Municipal Police Station human nakasupak sa Municipal Ordinance no. 763-2016 Art. 10 Sec. 1 Paragraph 1 ug RA 8550 o Fisheries Code of the Philippines of 1998.
