Misaka na sa 10 ka mga indibidwal an naigo nan Leptospirosis sugod pa nan pag igo nan #BagyongBasyang adton Pebrero 12, na nagresulta sa mga pagbaha sa Probinsiya nan Surigao del Norte lakip na an syudad nan Surigao, ini an tagbutyag sa opisina nan Marajaw na Panglawas nan syudad. Sumaya kay Mrs.Garospe Menor, an Cluster Program Coordinator nan City Health Office, duha na ka-tawo an napatay sa Leptospirosis na gikan sa Barangay San Juan. Unom sa mga biktima an nakagawas na sa mga ospital, samtang duha isab ka mga bag-o na biktima an naconfine kuman sa ospital. Tag-awhag nan City Health Office an mga residente na magpakonsulta dajon sa doktor kon gihilantan suyod sa duha ug kapin ka mga adlaw, hilabi jadton mga nihumol sa tubig-baha. Ini na sakit makuha gikan sa paghumol sa tubig baha na malipa labina kon may mga lipa gikan sa mga hayop pareho sa ilaga o ambaw. Sa pagkakuman tag awhagan nan City Health Office an mga individual na nahumol sa baha sa milabay na bagyo og makusog na pag uyan na mokadto lamang sa mga barangay health center para matagaan nan libre na tambay kontra sa amo na sakit. (Report by RadyoMaN Jerson Fuentes) Sent from my Samsung Galaxy smartphone.
