Naaresto na si Ozamiz City Councilor Ricardo “Ardot” Parojinog human ang halos napulo ka bulan nga pagtago.
Si Ardot, igsoon ni Ozamiz City Mayor Reynaldo “Aldong” Parojinog nga napatay niadtong Hulyo 30, 2017.
Matud ni P-N-P Spokesperson Police Chief Superintendent John Bulalacao ang pagka-aresto ni Ardot gikumpirma mismo ni PNP Drug Enforcement Group Director Police Chief Superintendent Albert Ferro.
Nahitabo ang pag-aresto kang Parojinog human maghatag sa tip ang Philippine National Police (PNP) sa Taiwan Police.
Sa dihang nasikop si Ardot sa Pingtung County Taiwan, gilayon kining gipahibalo sa Taiwan Police sa kapulisan sa Pilipinas.
Magpadala usab sa team ang P-N-P sa Taiwan aron mabalik sa Pilipinas si Ricardo.
Mahinumduman nga August 2017, nagpagawas sa lookout bulletin ang Department of Justice batok kang Ricardo human ang gihimong raid sa balay sa mga Parojinog kung asa narekober ang mga armas ug bala.
Dunay patong usab nga lima ka milyon ka pesos nga reward money alang sa makasikop kang Ardot Parojinog.
