Roxas City, Capiz- Dakop sang mga katapo sang kapulisan sang Roxas City PNP ang isa ka persona nga kawatan sang pabo kag inugbulang nga manok samtang ini ang nagapanago sa Brgy. Baybay Roxas City.
Suno sa 28-anyos nga tagreklamo nga si Ramonito Hierro y Alojado sang Brgy. Lawaan nadiskubrehan sini nga nadula ang ginapanag-iyahan nga napulo ka inugbulang nga manok kag walo ka mga pabo. Ang ginatudlo nga suspek amu si Christian Alojado y Valdez alias Hido, 27-anyos sang nasambitan man nga barangay.
Matapos nga makig-angut sang biktima sa kapulisan, ginkasa sang mga ini ang entrapment operation kontra sa suspek pinaage sa pag-contact diri nga baklon ang mga manok kun sa diin nahisugtan nga magakit-anay sa atubang sang Bangko Sentral ng Pilipinas sa Brgy. Baybay. Posible nga nakamutik ang suspek gani nga wala ini makigkita sa kapulisan.
Samtang isa ka menor de edad ang nakatudlo sa mga otoridad kun sa diin natago ang ginpangkawat nga manok sang suspek. Pito na lamang sa napulo ka mga inugbulang nga manok ang ila nga narekober.
Matapos ang pila ka minutos nga paglagas sa suspek, ini ang natigayon nga madakpan sang mga tawo nga yara man sa lugar nga nagbulig sa mga otoridad.
Samtang sa ginpatigayon nga dugang nga interogasyon sa suspek, gin-ako sini nga nabaligya na niya ang pabo kag iban nga manok samtang ang isa naman ang iya ginluto.
Sa subong ini na ang nakahunong sa lock up cell sang Roxas City PNP.
© photo from web
