Davao City – Gidugok og daghang mga mabdos nga mga nanay ang gipahigayong ika-15 Anibersaryo sa National Araw ng Buntis karong adlawa sulod sa usa ka dakong mall sa may Bajada ning dakbayan.
Sa pakighinabi sa DXDC 621 Rmn Davao kang Philippine Obstetrical and Gynecological Society kun POGS Southern Mindanao Chapter President Dra. Sonia Rose Santos ilang gikalipay nga gatusan ka mga buntis ang ilang libreng naserbisyuhan ug nahatagan og mga pahalipay ug mga papremyo.
Gawas sa gihimong Buntis Disaster Preparedness and Risk Reduction nga lecture, nagpahigayon usab og open forum uban ang mga OB Gyne Doctors, Department of Social Welfare and Development kun DSWD XI, Office of the Civil Defense XI, Cental 911 ug Department of Health XI.
85 ka mga libreng ultrasound ang gihatag sa mga palarang mga mananaog atol sa mga padula, nag apod-apod usab ug upat ka mga kuna, strollers, playpen ug cash prizes ug uban pa.
Nalingaw ug dako usab ang pasalamat sa lima ka bulang buntis nga si Jeralyn Respecio, nga taga-Prk. 20 Sangguilangan Maa, kinsa usa sa mga biktima sa bagyong Vinta sa susama niini nga paghatag og kahibalo kanila.
Dakong tabang gayod ang pagpangandam ug ang pagtuman sa mga preemptive evacuations sa lokal nga panggamhanan aron dili gayod mabutang sa peligro ang mga kinabuhi.
RadyoMaN Aimee Guinita
