BACOLOD CITY – Ginkawatan sang iya kwarta kag cellphone ang isa ka soltero nga natulugan sa atubang sang isa ka convenience store kaina sang kaagahon sa dalan San Juan, ciudad sang Bacolod.
Nakilala ang biktima nga si Rennell Sira, 28 anyos ang edad, pumuluyo sang Yulos Park, Brgy. 14, Bacolod City.
Suno sa biktima nga natulugan ini siya sa atubang sang ENZes Store sa San Juan Street diri sa ciudad sang Bacolod.
May mga las 5:10 kaina sang kaagahon sang ini ang nakabugtaw kag nakibot siya nga wala na ang iya wallet nga may unod P800 pesos nga cash kag importante nga mga ID subong man ang iya cellphone nga naga-balor sang kapin P8,900 pesos.
Nagapati ang biktima nga durante ini siya nagakatulog, nagpalapit sa iya ang suspek, ginkuha ang iya mga gamit kag nagpalagyo.
Wala na sang may nahimo pa ang biktima kundi ang magdagon-dagon sa Police Station 1 agud magpa record sang natabo sa iya./dyHB BACOLOD
