NBI: Granada, armalite, shotgun, shabu narecover sa raid sa balay sang active PNP member

BACOLOD CITY – Kinarton sang mga matag-as nga kalibre sang armas subong man mga bala, granada nga tuktukon kag pila ka sachet sang ginapatihan shabu ang narecover sang mga katapo sang National Bureau of Investigation (NBI) sa ginpatigayon nga raid pasado las 6 kaina sang aga sa puluy-an sang isa ka active police personnel sa Regeant Pearl 2 Subdivision, Brgy. Alijis diri sa ciudad sang Bacolod.

Pinaagi sa isa ka search warrant nga gin-issue sang NBI Manila, ginhalughog sang mga utoridad ang balay ni SPO1 Joshua Barile, aktibo nga katapo sang police assigned sa Regional Command Security Unit.

Kalakip sa mga matag-as sang armas nga narecover amo ang M16, shotguns, baby armalite, .45 calibre pistols, 357 calibers, Ingram , 9mm calibers, magazines, mga bala, tatlo ka granada kag ginapatihan shabu.


Ginpaathag ni Barile nga ang amo nga mga armas ang para sa court exhibit kag ginturn over gid lamang sa iya sang korte bilang custodian.

Depensa ni Barile nga gindala niya sa iya balay ang amo nga mga armas bangud nga indi na maka igo sa vault sang ila opisina sa Brgy. 39 ang amo nga mga armas, gutok na ini didto kag indi na safe bangud duha gid lamang sila ang nagabantay diri.

Apang, ginadeny naman ni Barile nga iya ang granada kag ang sachet sang shabu nga na recover sa iya balay.

Madumduman nga si Barile ang na implicate sa kamatayon sang utod kag amay sang kilala nga bagman sang Beria Drug Group nga si Ricky Sereño.

Sa pihak nga bahin, kadungan sang raid nga ginpatigayon sang NBI sa balay ni Barile ang pagsulod man sa balay sang nakilala kay Pinky Joe Jereza sa Carmella Valley, Talisay City sa pagpati nga ini ang nagahupot man sang armas.

Apang sang ginsulod na sang mga utoridad ang balay ni Jereza, wala sang may narecover nga armas./dyHB BACOLOD

Facebook Comments