Gihisgutan sa session regular sa Sangguniang Panlalawigan sa ang Novel Corona Virus outbreak nga usa ka delikadong sakit ug mikalas sa pipila ka kinabuhi didto sa nasod sa China.
Lakip nga nahimong bisita si Provincial Health Officer Dr. Ricardo Reyes ug Bukidnon Provincial Medical Center o BPMC sa Malaybalay City Chief of Hospital Dr. Sulpicio Henry M. Legaspi, Jr.,MD,MPH,FPSMS,CESE.
Sa nahimong question hour, gipangutana ang duha ka doctor kung unsa ang mahimo sa Provincial Health Office (PHO) ug BPMC kung adunay kaso sa corona virus nga moabot dinhi sa probinsya.
Gibutyag ni Doctor Reyes nga kung adunay symptom o timailhan sa maong virus sama sa hilanat, ubo ug sip-on, kinahanglan i-quarantine o i-isolate ang maong pasyente ug ipailalom sa makuti nga imbistigasyon, ug sutaon kung asa nagikan ang maong pasyente, kung usa ba kini ka OFW o balikbayan, usa langyaw o foreigner o nagbyahi ba kini gikan sa nasud nga adunay naila nga kaso sa corona virus.
Matud pa ni Dr. Legaspi, nga nakaandam ang buhatan sa BPMC kung ugaling adunay moabot nga kaso sa corona virus sa atong probinsya. Adunay gitagana nga mga lawak o kwarto ang BPMC aron ma-isolate ug ma-quarintine ang maong pasyente ug mabulag kini sa uban.
Gipangutana usab kung kinahanglan na ba nga magsuot ug mask aron proteksyon sa maong virus gumikan kay makuha ang maong sakit pinaagi sa hangin. Apan gibutyag sa 2 ka doctor nga dili pa kinahanglan gumikan kay wala pay kaso nga natala sa Bukidnon.
