Gitulis na gikuhaan pa og motorsiklo sa wala mailing mga suspek ang usa ka negosyante samtang nagbyahe paingon sa syudad sa Pagadian gikan sa lungsod sa San Miguel alas 11 kagahapon sa buntag.
Giila ang biktima nga si Federico Bulanon, 26 anyos residente sa New Agora, Sta. Lucia ning syudad sa Pagadian.
Sa imbestigasyon sa San Miguel PNP, samtang gimaniho sa biktima ang single motor Kymco color pula kalit nga miabot ang laing single motor XRM 110 diin sakay ang mga suspek nga armado sa wala matino nga calibre sa armas nga maoy giti-un ngadto sa negosyante.
Malampuson nga nadala sa mga tulisan ang usa ka cellphone, kwarta nga mobalor sa 29, 700 ug lakip nga gidala ang iyang single motor.
Daling gironda sa kapulisan ang maong dapit dihang nadawat ang taho, alas 3:30 sa hapon narekober ang single motor nga gipanag-iyahan sa biktima didto sa Sitio Dumakiton, Brgy. Lower Dimaya,Dinas Zamboanga del Sur.
