Sikop ang usa ka negosyante ug ang kauban niini atol sa buybust operation pasado alas tres sa hapon niadtong Huwebes sa Barangay Marawi Poblacion sa Marawi City.
Nakuha gikan sa suspect ang kapin kun kulang usa ka kilo sa gituohang shabu nga adunay gibana-banang market value nga dos milyones pesos.
Nakuha usab gikan sa negosyante ang usa ka libong buy bust money, boodle money nga nagkantidad og 2.2 million pesos ug lain-laing mga identification cards ug pitaka.
Matud ni Police Captain Jemar Delos Santos, Information Officer sa Police Regional Office BARMM, ang target sa operasyon mao si Alexander Dayondong Aliponto, taga Tamparan, Lanao del Sur ug ang kauban niini nailang si Adam Pandiin, kinsa ilado sa alyas nga “Titing” nga taga Marawi City.
Matud ni Marawi City Mayor Majul Gandamra nga giangkon ni Aliponto sa mga otoridad nga aduna siyay negosyo nga glass palace sa Tamparan apan ipasusi pa kini sa mayor sanglit dili man siya suhito sa maong tawo.
Posible, matud pa, nga nangita lang kini og alibi o excuse.
Ang maong joint operation gipahigayon sa Philippine Drug Enforcement Agency (PDEA) sa Bangsamoro Autonomous Region in Muslim Mindanao (BARMM), Marawi Police Station, 1403rd Regional Mobile Force Company ug 103rd Infantry Brigade, Philippine Army.
Gidayeg ni Mayor Gandamra ang PDEA ug uban pa’ng mga pwersa nga mihimo sa maong operasyon.
Matud sa mayor nga dili niya itugot nga ang mga residente sa Marawi ug sa uban pa’ng mga munisipyo sa Lanao del Sur, mohimo og ilegal nga transaksiyon sa siyudad ilabina kay anaa pa sila karon sa proseso sa pagbangon gikan sa pagkaguba tungod sa Marawi siege.
Ang mga suspek ug ang mga ebidensiya anaa na karon sa kostudiya sa PDEA BARMM.
Source: RMN Iligan
