Gisikop sa kapulisan sa Region 10 ang usa ka negosyante pinaagi sa mga search warrants.
Matud ni Police Regional Office 10 Spokesperson Supt. Lemuel Gonda nga ang suspek mao si Alexander Belo Balas, 42 anyos, ug taga Sitio Dilimbayan, Barangay East Poblacion, Baloi, Lanao del Norte.
Ang negosyanteng si Balas, nakuhaan sa kalibre 45 nga dunay usa ka chamber nga loaded sa bala sa maong armas ug usa pa ka gisulod nga magazine nga loaded sa walo ka bala, usa ka kalibre .38 nga dunay lima ka bala, usa ka fragmentation grenade, usa ka M79 grenade launcher, tulo ka M203 granades, usa ka magazine sa kalibre 45 nga dunay pito ka bala, usa ka grenade launcher hand guard; usa ka sudlanan sa magazine sa kalibre 45, duha ka inside holsters, usa ka outside holster; upat ka bandoliers, sling bag, pouch, unom ka sachet sa gituohang shabu ug usa ka disposable lighter.
Nasikop ang suspek niadtong Huwebes sa gabie sa hiniusang pwersa sa 12th SAC, SAF, 103rd SAC, SAF, CIDG, PIB, PMFC Lanao Del Norte ug Baloi, Municipal Police Station sa Lanao del Norte.
Duha ka search warrant ang dala sa kapulisan nga mao ang search warrant number 21-345 alang sa pagsupak sa Republic Act 10591 ug Search Warrant number 21-346 sa pagsupak sa Republic Act 9165 nga gi-isyu niadtong Hunyo 6, 2018 ni Hon. Alberto P. Quinto, Presiding Judge sa Regional Trial Court, Branch 21 sa Kapatagan, Lanao del Norte.
Gipriso karon si Balas sa prisohan sa Linamon Municipal Police Station sa Linamon, Lanao del Norte.
