Bangkay na sang nasapwan sini gid lamang nga aga sa likod sang isa ka hotel sa Brgy. Mandalagan ang isa ka negosyante nga Muslim nga ginreport gin-abduct las 9 kagab-i sa area sang Brgy. 10.
Ang biktima ginkilala kay Untao Sakar, 64 anyos, tumandok sang Marawi, temporaryo nagapuyo sa Brgy. 10, Bacolod City kag amo ang presidente sang Muslim association sa ciudad nga Maranao Tribe.
Suno sa asawa sang biktima nga si Norlyn Sumagaysay, 30 anyos, samtang nagalakat sila sang iya bana papauli halin sa ila tindahan, may nagdulog nga isa ka SUV kolor pula kag may nagpanaug nga duha ka lalaki nga armado sang malagba nga armas kag pilit nga ginpasakay ang biktima kag gilayon nagpalagyo.
Sa atubang sang iya kasubo, nagakatingala man ang asawa kon ngaa ginhimo ini sa iya bana bangud nga sa iya pagkahibalo, mabuot ini kag mabinuligon sa iya kaangay nga mga Muslim.
Wala man nagapati ang asawa nga negosyo ang motibo sang krimen bangud wala sila sang problema sa ila negosyo nga cellphone accessories kag indi man ini natuhoy sa illegal nga druga.
Nakita man sa tupad sang bangkay ang isa ka karatula (placard) kag nakabutang ang mga tinaga nga: ” Wag tularan big time pusher ako.”
Samtang, suno naman sa anak nga lalaki sang biktima, posible nga hold-up ang motibo sa pagpatay sa iya amay bangud sang kwarta nga iya ginadala.
[image: image.png]
