HIMAMAYLAN, NEGROS OCCIDENTAL – Wala sang idea ukon ihibalo ang mga pamilya sang duha ka mga ginasuspetsuhan nga miembro sang NPA nga kabahin sang 6 ka mga gindakup sang 62nd Infantry Batallion sa natabo nga isa ka enkwentro sa Sitio Tomonon, Barangay Luyang, Mabinay, Negros Oriental sang nagligad nga Sabado, Marso 3, nga ini sila gali ang nag-rebelde na.
Ini ang ginpahayag ni Brgy. Buenavista, Himamaylan Punong Barangay Harry Higgins angut sa pagkadakup sa ila nanday Jomar Indic, 29 anyos ang edad kag Randel Balasabas Hermino,19 anyos ang edad, lunsay pumuluyo sang Brgy, Buenavista, Himamaylan City, Negros Occidental.
Sanday Indic kag Herminio ang gindakup sang mga katapo sang 62nd Infantry Battalion upod sa 4 ka iban pa nga ginasuspetsuhan miembro sang NPA lakip ang isa ka amasona kag duha ka ginaalegar child warrior.
Suno kay Higgins nga halos isa ka tuig na nga naghalin sa ila lugar ang duha matapos naglisensya nga ini sila ang magapadulong sa Manila.
Pahayag sang punong barangay nga tuman ka pigado ang pamilya sang duha bangud nga nagabaligya man lamang gani sang saging kag iban pa nga produkto sa uma ang pamilya sang mga ini sa Tanawan, Kabankalan City.
Gin-ako ni Higgins nga makapila ka beses na ini siya nga ginkadtuan sang ma katapo sang army kag ginpamangkot angut sa duha.
Nahibaluan nga ang Brgy. Buenavista ang tuman ka layo nga lugar halin sa ciudad sang Himamaylan, indi na malab-ot sang bisan motor kag kapin 2 tubtub 3 ka oras ko lakton sa banas-banas.
Kaupod sang duha nga nadakpan si Myles Cantal Albasin, 21, isa ka Mass Communication graduate sang University of the Philippines – Cebu nga katapo man sa Nagkahiusang Kusog sa Estudyante (NKE). (Read Official statement here https://www.facebook.com/upcebuNKE/posts/1988482508136464)
Si Albasin ang tumandok sang Cagayan De Oro kag former Secretary General sang Anakbayan Cebu.
Arestado man si Joey Baylosis, 18, sang Mabinay, Negros Oriental kag ang duha ka mga minors nga lunsay naga-edad 17 anyos halin sa Kabankalan City, Negros Occidental kag Mandaue City, Cebu.
Ang mga nadakpan ang ginpasakaan na sang kaso sang Negros Oriental Provincial Police Command kasunod nga nakuha sa ila ang 4 ka M-16 assault rifles, M203 Grenade launcher kag 2 ka M-4 assault rifles./ Photo by NKE UP Cebu
