ILOILO CITY – Patay ang 44 anyos nga Negrosanon nga personal assistant ni Kapitan Remia Prevendido Gregori matapos nga gin-paarakan sang luthang ang kubo nga nahamtangan ni kapitan sa Crystal beach Resort sa Igcadlum, San Joaquin, Iloilo las 4:30 kahapon sang hapon.
Ginpahayag ni Police Sr. Inspector Asencion Ortizo, hepe sang San Joaquin PNP, ginkilala ini kay Analie Antepatia, 44 anyos, tumandok sang banwa sang Isabela, Negros Occidental.
Suno kay Ortizo nga naigo si Antepatia sang paulanan sang luthang sang indi magnubo sa napulo ka mga suspek ang kubo nga nahamtangan ni Gregori.
Siya man ang nagaserbe nga courier ukon nagadala sang mga stocks sang druga sa ila mga ginasupplayan suno sa PRO-6.
Gindala pa sanday Kap. Gregori kag Antepatia sa San Joaquin District Hospital apang wala na natabangan bangod sa mga patal nga igo sa lawas.
Naigo man ang bana ni Kapitan nga si Bonifacio Gregori, Sr. sa iya nga tiil kag nakaluwas.
Si Kapitan Remia Gregori ang utod sang anay High Value Target No. 4 nga si Richard ‘Buang’ Prevendido nga napatay sang Setyembre 2017 sa police operation.
Sa report sang Philippine National Police, High Value Target No. 3 si Kap. Gregori upod ang iya kabataan nga lalaki kag babaye nga may mga pending warrant of arrest. / RMN Iloilo photo of Analie Antepatia
