MANAPLA, NEGROS OCCIDENTAL – (UPDATE) Handa nga atubangon sang Negros Occidental Police Provincial Office (NOCPO) ang mga akusasyon nga overkill ang natabo nga drug buybust operation kahapon sa banwa sang Manapla nga nagtuga sang kamatayon sang isa ka drug leader kag sang tatlo ka iban pa.
Ini ang ginpahayag ni NOCPO Provincial Director PS/Supt. Romeo Baleros kon diin iya ginsiling nga isa ka lehitimo nga operasyon ang ginpatigayon sang Manapla Municipal Police Office kag ginapanindugan nga nag-bato ang mga suspek rason nga ini sila ang natiruhan kag nagkalamatay.
Madumduman nga may mga las 7 kahapon sang aga, nagpatigayon sang buybust operation ang Manapla MPS sa Had. Bariw, Brgy. Sta. Teresa kag nadakpan ang mga suspek nga sanday Alson Aguirre, tumandok sang Silay City kag ginasiling leader sang amo nga grupo kag ginakabig man nga high value target.
Napatay man sa operasyon sanday Ruben Pinoy, Alyas Totong Torres sang Brgy. Sta. Teresa kag Reynante Sombero sang Taytay Begonia, Brgy. Purisima, tanan sang Manapla.
Ginpahayag sang Manapla MPS nga pila ka bulan na nga gina monitor ang mga suspek gani nadakpan ang mga ini sa operasyon nga ginpatigayon kahapon, apang nagbato ang mga suspek rason nga ini sila ang natiruhan kag nagkalamatay.
Nakuha sa mga suspek ang 2 ka putos sang suspected shabu nga may market value nga kapin sa P1.386 million pesos subong man 2 ka long firearms kag 4 ka short firearms lakip na ang mga bala.
Sa pihak nga bahin, nagpadulong naman sa pulis ang nagabusong nga live-in partner sang napatay nga si Aguirre upod ang isa pa gid nila ka bata agud nga magpa kustodiya bangud nahadlok ini sa pamahog sang mga himata sang tatlo ka iban pa nga nagkalamatay.
Suno sa babayi nga nahadlok ini bangud nga may nadalahig ang iya live-in kag posible nga magbalos sa ila./DYHB NEWSROOM
