Muerto el un negocianta despues por segunda vez ya queda este victima de tiroteo na Guiwan.
El victima amo si Jenelis Curambao Niida, 33, de Callejon Drive, Guiwan.
Conele ya sopla de tiro na highway del Guiwan serca na entrada del Guiwan Porcentro serca man alas 10 del noche.
Asegun na report del pulis ta aparese si Niida ya munta na tricycle desde na Guiwan Flea Market donde ya manda este con el tsuper lleva conele na Alejo Alvarez na San Jose.
Pero cuando ya llega sila lampas lang na entrada del Guiwan POrcentro, tiene ya lang un XRM motorsiclo ya man overtake canila y para adelante donde tenia tambien que para el tricycle.
Asegun con el tsuper del tricycle si Erwin Clavero, el mismo tambien quien ta manega con el motorsiclo amo el ya arangca un revolver y ya sopla de tiro consu pasagero si Niida por dos beses.
El criminal ya entabla despues del incidente mientras con el victima quien ya sostene tupada de bala na prente y lao derecha carrillo na lleva na un hospital pero ya despidi este amediante el tratamiento medical.
Si Niida quien ta dueña un tienda na Putik, ya tira ya tambien conele del mes de Octubre, 2014 afuera del Callejon Drive na Guiwan MIentras ta bolbe le pero ya salva le con el mencionao incidente.
Asegun pendiente pa el caso na corte contra con el quien ya tira conele.
Si Niida un esposa del Japones.
El pulis ta mira elo anggulo de “love triangle” como el posible motivo del incidente.
