MANAPLA, NEGROS OCCIDENTAL – Ginabulubanta nga nagdangat sa kapin P320 mil pesos ang cash nga nakuha sang mga suspek matapos ila gin-ransack up pasado las 10 kagab-i ang main office sang North Negros Electric Cooperative ( NONECO ) sa Barangay Tortosa, Manapla.
Suno sa imbestigasyon sang Manapla Municipal Police Office ang insidente natabo may mga las 10 kagab-i kon diin ginsulod sang kapin 6 ka armado nga mga kalalakinhan ang talatapan sang amo nga electric cooperative.
Ginpahayag nga una gin-gapos sang mga suspek ang security guard sa gate kag ginsunod ang roving guard kon diin ginpatudlo sa iya ang iban pa gid nga gwardiya nga naka duty sa amo nga tion.
Gintipon sang mga suspek sa isa ka kwarto ang 4 tanan ka guard on duty kag gindis-armahan ang duha sa ila.
Sunod nga ginhimo sang mga suspek amo naman ang pagkuha sang 4 ka mga empleyado nga naga overtime sang amo nga tion bangud may ginapatigayon nga auditing kag ini sila ang gin-impon sa kwarto nga ginbutangan sang mga gwardiya.
Matapos sini, didto na kag ginsulod sang mga suspek ang nagkalain lain nga departamento sang opisina tubtub nga ila nalab-ot ang vault kag gin-wasak ini gamit ang bara kag ginkuha ang kapn P320 mil pesos nga cash.
Gilayon nga nagpalagyo ang mga suspek sa direksyon sang Victorias City.
Sa karon ginapadalman na sang Manapla Police ang imbestigasyon kon diin wala ginadula ang posibilidad sang inside job bangud nga may ihibalo ang mga suspek sa pasikot-sikot sa sulod sang NONECO./dyHB BACOLOD
