Gikumpirma kagabie (March 8, 2020) sa Department of Health (DOH) nga muabot na sa 10 ka kaso sa COVID-19 ang natala sa nasud.
Kini human adunay bag-ong upat nga kaso sa coronavirus disease (COVID-19) .
Samtang sa interview sa RMN Malaybalay ngadto kang Dr. Ian Gonzales ang cluster head sa Infectious Diseases sa DOH 10, gibutyag niini nga bisan pa man sa mao nga kaso, nagpabiling COVID-19 free ang tibook Northern Mindanao.
Matud ni Dr. Gonzales nga negatibo ang tanang 16 ka mga Person Under Investigation PUI’s sa rehiyon.
Bisan pa man niini, nagpadayon ang ilang screening prodecures sa mga airport ug seaport ug pagpakusog sa surveillance sa komunidad aron malikayan ang pagsulod sa coronavirus sa Northern Mindanao.
Sa karon gideklara sa DOH ang code red (alert level 4) sublevel 1 nga ideklara kung adunay usa o sobra pang kaso sa local transmission.
Apan giklaro usab ni Dr. Gonzales nga walay sustain community transmission sa nasud tungod kay kasagaran sa mga nagposibitibo sa coronavirus mga imported nga kaso.
Gipasabot pa niya nga ang kalainan sa local transmission ug community transmission.
Sigun ni Dr. Gonzales nga ang local transmission kung adunay pasyente natakdan sa laing pasyente sa sulod sa Pilipinas apan ma-trace kung kinsa ang source, samtang ang community transmission mao nga kung adunay matakdan nga dili na gayod ma trace kung aha gikan ang mao nga sakit nga nagpasabot nga daghan na ug kaso.
Gibutyag niya nga sa karon anaa pa sa local transmission ug wala pa sa community transmission.
