ZAMBOANGA CITY—Un alegaomente notorioso persona ya sale arestao durante el raid ya conduci el maga pulis Talusan Municipal Police Station, na Zamboanga Sibugay de dia pasao.
El portavoz del Policia Regional Nueve ya nombra conel suspechao como si Muksin Sabiran Hapil, alias Usi Hapil, de barrio Kasigpitan, Talusan del mismo municipalidad.
Durante el raid, el maga pulis ya recobri na su residencia un caliber 45 pistola con dies maga bala, 24 bala de 30 calibre rifle, 4 grande y dos diutay paquete de shabu, sais seliao straw ta contene tambien shabu, 4 clip de Garand rifle nohay bala, dos magazine de caliber 45 nohay bala, un gende usao aluminum foil y un trigger housing de Garand rifle.
Si Hapil ta enfrenta ahora differentes caso na corte.
Con el raid ya encabesa si Insp. Ronald Maravilla Lozada. – Dan Toribio
