NPA gin-ako ang pagpatay sa chief Civil Defense group sang Moises Padilla

600

MOISES PADILLA, NEGROS OCCIDENTAL – Ginakabig sang rebelding hubon sang New People’s Army, NPA nga isa ka kadalag-an ang pagpatuman sang silot sang Special Partisan Unit ukon SPARU batuk sa leader sang Civil Defense Group sa banwa sang Moises Padilla sadtong Domingo, la una sang hapon, sa Brgy. Quintin Remo sa amo nga banwa.

Ini ang ginpahayag sang deputy spokesperson sang Leonardo Panaligan Command sang NPA nga si Ka Ann Jacinto sa interview sang DYHB angut sa natabo nga pagpatay sa biktima nga si Rusty Caramihan Caminade, 32 anyos, residente sang Sitio Mamballo san amo nga barangay kag head sang Civil Defense Group sadtong October 28.

Suno kay Ka Ann nga si Caramihan ang pinuno sang isa ka armado nga grupo nga gintukod ni Mayor Magsie Peña agud himuon private goons sa Moises Padilla kon diin ang ila sweldo naghalin sa kaban sang banwa.

Ginpahayag pa ni Ka Ann nga ginapangunahan ni Rusty ang kapin 30 ka miembro sang amo nga grupo kag armado ang mga ini sang AK47, M16, KG9, shotgun kag mga calibre .45 nga pistola.

Dugang pa ni Jacinto nga madamo sang kaso ang biktima kaangay sang robbery, murder kag rape apang wala nagapasaka kaso ang mga biktima bangud sa kahadlok kag wala kwarta nga inugbayad sa abogado.

Ginapasibangud man sang NPA kay Caramihan ang pagpatay kay Jerry Tordas sadtong April 28, 2018 subong man responsible sa pag-straffing sa balay ni Remy Saludares sadtong 2017 nga nagtuga sang kamatayon sini kag iya nga timbang./dyHB BACOLOD

Facebook Comments