ILOILO – Isa ka lider sang New People’s Army ukon NPA ang suspek sa pagpatay kay punong barangay Eustaquio Porras sang Lonoy, Calinog sang nagligad nga Martes.
Ini ang ginkumpirmar ni PSSupt Marlon Tayaba, Director sang Iloilo Police Provincial Office ukon IPPO.
Suno kay Tayaba, vice commanding officer sang NPA central front committee ang suspek nga si Ronald Llupar alyas Ka Isidro, 34 anyos sang bag-ong Barrio, Tapaz, Capiz nga una na nagpakilala bilang si Vincent Paduga.
Dugang pa ni Tayaba nga may mga warrant of arrest si Llupar sa kaso nga rebelyon , murder kag arson.
Ginconfirmar man ni Tayaba nga base sa ila inisyal nga pagpamangkot sa suspek, nag-ako si Llupar nga ginbayran siya sang bana bangod gina-kabit ni kapitan Porras ang iya asawa.
Padayon naman ang imbestigasyon sang kapulisan sa upod ni Llupar nga ginkilala na gid lamang kay Ka Ramon kag ginapahayag miyembro man sang NPA.
Nahibaluan nga nadakpan sang kapulisan si Llupar matapos gin-confine sa Qualimed hospital matapos naigo sang bala sa idalom sang tiyan sang nagbalos palupok si punong barangay EUSTAQUIO Porras.
