General Santos City—Gikumperma ni Police Chief Inspector Ramil Villagracia, Hepe sa Tboli PNP nga hangtod karon, wala pa nila napasang-at ang kaso batok sa mga nagpailang miyembro sa NPA nga una nang misunog sa packing plant sa Sumifru nga nahimutang sa ilang AOR.
Sumala niini nga hangtod sa kasamtangan wala pa nahidangat sa ilang buhatan ang representante sa kumpanya aron sa paghimo ug Affidavit isip complainant.
Gihingusgan usab ni PCI Villagracia nga Dili mapugos sa kapulisan ang kumpanya kung wala silay interest nga magpasang-at ug kaso batok sa mga suspek.
Wala usab sila masayod kung gibaharan pa sa armadomng grupo ang kumpanya nga sunugon subli ang ilang planta higayon nga mupasang-at sila ug kaso.
Hinuon subling suwayan sa Tboli PNP ang kumpanya nga kumbinsihon nga mupasaka ug kaso batok sa mga suspek. Kahinumduman nga una nang gisunog sa mga armadong lalaki ang packing plant sa Sumifru pila na ka simana ang nakalabay.
